|
|
#11
2010-11-05, 01:56 AM
|
|||
|
|||
الحلقة الرابعة السلام عليكم ورحمة الله وبركاته حبيبة بابا كانت نايمة كل دا بتحلم بالنقاب قالت اما نام احسن في الوقت اللي الناس كلها مظأططة بالكأس . بس الحمد لله صحيت وبدأت تفكر ازاي هتقنع ماما وبابا بالنقااااااااااااااااااااااب وطبعا هي قلقانة عشان عارفة ان ماما وبابا صعب اقناعهم بس صبرت نفسها وقالت مفيش حاجة صعبة ع ربنا ان شاء الله فهو قادر سبحانه انه يخليهم يوافقوا زي ما خلاهم يوافقوا ع الحجاب . فحبيبة بابا محتارة تفتح الموضوع ازاي معاهم !! فخرجت مع ماما ف مشوار وكان الحوار بينهم كالاتي : حبيبة بابا : اتصوري يا ماما ان بعد اما لبست الحجاب او الايشاربات الطويلة والعبايات المعاكسات من الشباب مبطلتش ابداااااااا بل حسيت انها زادت كمان . ماما : يا سلام !!! اتجننوا دول ولا ايه ؟؟! حبيبة بابا : اه يا ماما فعلا زادت اوي المعاكسات , بس ع فكرة انتي مستغربة اوي ليه كدة ما وش المرأة هو اللي فيه الفتنة كلها مش جسمها وانا غطيت كل جسمي بلبس واسع ما عدا وشي فعشان كدة لسه بتعاكس ولا ايه رايك يا ماما ؟؟! ماما : رأيي في ايه ؟؟ حبيبة بابا: في ان وش المرأة هو اللي فيه الفتنة وهو اللي بيجيب المعاكسة وانها لازم تتقي الله ومتخليش حد يعاكسها . ماما : اه فعلا الوش هو اللي بيبن الجمال كله بس الجسم برده عليه عامل واهو انتي غطتيه ومبقاش متحدد من جسمك حاجة . حبيبة ماما : ماشي يا ماما يا حبيبتي منا الحمد لله جسمي مبقاش يتعاكس بس لسه وشي بيتعاكس ايه الحل بقي ؟! اني اغطيه ولا ايه يا ماما ؟! ماما : ايــــه ؟! تغطيـــــه ؟! يعني تلبسي البتاع اللي اسمه النقاب دا اللي بيبقوا عاملين زي العفاريت ماشين مستحيل طبعا . حبيبة بابا ف سرها : يا نهار ابيض وغيرت الموضوع . طيب يلا يا ماما يا حبيبتي تطلع البيت بقي . حبيبة بابا اتغمّت من حوار ماما معاها عن النقاب بس طبعا هي مفقدتش الامل من اول حوار وعمالة تفكر تفكر تفكر هتعمل ايه ف الموضوع دا ؟! ففتحت الموقع الرائع الطريق الي الله وقرت موضوع عن حكاوي المنتقبات وقصص نقابهم تستفيد منهم فلاقت الموضوع دا :  وقعدت تقري ف قصص جميلة وعن صبر الاخوات ع الابتلاءات وان معظم الاخوات كان اكبر عائق لهم هم الوالدين واتعلمت ان اهم حاجة هم رضاهم عليا واني معليش صوتي عليهم واصبر عليهم وف نفس الوقت طبعا انا عند موقفي اني هلبس النقاب والله المستعان . ــــــ بابا بيحب حبيبة بابا اوي وبيحب يقعد معاها ويدردش معاها فخبط عليها اوضتها ودخل عليها : بابا : ايه يا حبيبة مالك يا حبيبتي متغيرة اليومين دول ليه ؟! ومبقتيش تقعدي مع بابا حبيبك ؟ حبيبة بابا : لا يا بابا مفيش يا حبيبي انا بس مضايقة شوية . بابا : من ايه حبيبتي ؟ حبيبةبابا: انا هقولك يا بابا يا حبيبي عشان عارفة انك هتفهمني , اللي مضايقني هو ف شباب كتير اوي بتعاكسني وانا ماشية ف الشارع وبيقعدوا يبصوا ع وشي بابا : هم مين دول اللي عايزين قطع رقابيهم ؟؟! قوليلي عليهم وانا هتصرف ؟ حبيبة بابا : يا بابا يا حبيبي انا معرفهمش ولا هم يعرفوني بس هم بيعاكسوا اي بنت يكون وشها باين لان الوش هو اللي فيه الجمال والفتنة صح يا بابا ؟! بابا : اه صح طيب وانتي هتعملي ايه يا بنتي منتي مغطية نفسك اهو ولبسك محترم ومحتشم . حبيبة بابا : بس وشي باين وعشان كدة بتعاكس وانا قريت وسمعت خطبة للشيخ مسعد انور اللي انت عارفه يا بابا وبتحبه ع قناه الرحمة ان وش المرأة لازم يتغطي وقعد يجيب ادلة كتير من الكتاب والسنة وكلها مقنعة اوي . بابا : يا بنتي تغطي وشك ايه بس ؟! انتي مبتسمعيش اللي بيحصل برا والجامعات والسرقة اللي بنحصل من ورا اللي لابسين نقاب دول لالالا شيلي الفكرة دي من دماغك خالص احنا مش عايزين مشاكل فاهماني؟! حبيبة بابا : يا بابا هو عشان ناس استغلت النقاب غلط يبقي هو وحش ونبعد عنه ! طيب ما في ناس كتير بتصلي وبتعمل حاجات شنيعة يبقي نمنع الصلاة ! وفي ناس لبست لبس ظباط وهم اصلا حرامية يبقي نمنع الظباط والامن في البلد ؟! بابا : اقتنع بكلامها بس قالها : مش عايز لماضة وقفلي ع الموضوع دا وراح ماشي . حبيبة بابا هتتجنن تاني حوار فشل برده عن النقاب ياااااااااااارب اعمل ايه ياااااااااااارب دلني يارب هم صح ولا انا اللي صح ؟ وتعيييييييييييط حبيبة . ماما نادت ع حبيبة ماما : ياااااااا حبيبة .. تعالي عايزاكي . حبيبة بابا بعد اما مسحت دموعها : ايوة يا ماما. ماما : مالك يا بت فيكي ايه ؟؟ حبيبة : مفيش يا ماما ماما : اوعي يكون الموضوع اللي كلمتيني فيه امبارح بتاع النقاب دا _ قلب الام بقي _ .؟ بابا دخل ف الحوار وقال : ايه دا هي كلمتك فيه برده ؟ ماما : اه اتجننت الهانم . بابا : حبيبة انسي الموضوع دا من دماغك وبطلي تعقيد . ماما : قولها يابو حبيبة وعقلها حبيبة بابا : نعم يا ماما كنتي عايزاني ليه ؟ ماما : انزلي اشتري عيش من الفرن . حبيبة بابا : يا ماما الفرن بيبقي زحمة وبيبقي كله رجالة وبعدين انا مش عايزة انزل ووشي مكشوف هتعاكس كتير . ماما : وبعدين ف المعاكسة دي انتي فاكرة نفسك ملكة جمال العالم ؟؟ حبيبة بابا: لا يا ماما مش ملكة جمال ولا حاجة بس لازم ع كل مسلمة انها تغطي وشها سواء كانت جميلة او لا . ماما : ومين اللي لزمه ان شاء الله ؟ حبيبة بابا : ربنا والرسول عليه الصلاة والسلام وكل زوجات الرسول كانوا مغطين وشهم ودا ف زمن الصحابة والناس الطاهرة ما بالك بقي يا ماما في الزمن دا ؟! ماما : يوووووووووووو خلاص مش عايزة عيش انزل انت يابو حبيبة معلش . بابا : حاضر هنزل بس هي اهم حاجة تشيل الموضوع دا من دماغها وتبطل لماضة . حبيبة تدخل اوضتها وتنهاااااااااااااار في العياط تاني ومش عارفة تعمل ايه وتقنعهم ازاي ؟؟؟؟؟ والي اللقاء في الحلقة القادمة تكون حبيبة هديت شوية وعرفت تفكر هتعمل ايــــــه ؟؟؟؟؟؟ 
|
|
#12
2010-11-05, 03:00 AM
|
||||
|
||||
|
وعليكم السلام ورحمه الله وبركاااته
بارك الله فيك اخيتي جهدك رااائع جدا باارك الله في وقتك وعملك اتاااااااااااااابع ............
__________________
قال رب العزة والجلال:{وَقِفُوهُمْ إِنَّهُم مَّسْئُولُونَ }..  قال ابن عباس رضي الله عنهما: (لا تمار حليماً ولا سفيهاً فإن الحليمَ يقليك والسفيهَ يؤذيك, واذكر أخاك إذا غاب عنك بما تحب أن يذكرك به,وَأعْفِهِ مماتحب أن يعفيك منه,وعامل أخاك بما تحب أن يعاملك به.... قال تعالى (ليحق الحق ويبطل الباطل ولو كره المجرمون)
|
|
#13
2010-11-05, 10:32 PM
|
|||
|
|||
|
الحلقة الخامسة السلام عليكم ورحمة الله وبركاته حبيبة راحت تصلي ركعتين يهدوها شوية وتدعي ربنا كتيييييييير انه يقف معاها ويهدي والديها وسبحانه وتعالي مُجيب للدعاء فحبيبة خلصت صلاتها ومسحت دموعها وراحت عليها نومة وسابت الكمبيوتر مفتوح ع موقع الطريق الي الله وكانت صفحة عن النقاب مفتوحة مؤثرة : كلام راقي جدااا عن النقاب فماما دخلت تطمن عليها لاقتها نامت وسايبة الجهاز مفتوح فراحت ماما تقفله لاقت صور منتقبات كدة فاتفرجت عليهم وقالت فرصة اما اقري الكلام اللي اقنع حبيبة بالنقاب . فسبحان الله قعدت تقرا وتقرا وقلبها يرق ويصدق ويقتنع والحق بدء ينتصر ع الاعتقادات الخاطئة . ودي خطوة رائعة في صالح حبيبة وكله بفضل دعائها للمُجيب سبحانه فهو المُتحكم في قلب امها وقلب كل العباد . وصحيت حبيبة من النوم وحاسة بنسمة سعادة ليه مش عارفة بس حاسة وخلاص افتكرت حبيبة انها لازم تروح دراستها الايام اللي فاتت كانت اجازة وهي مش عايزة تنزل بوشها تاني فاتغمت تاني بعد اما كانت سعيدة بس انا كدة كدة هنزل بوشي المرة دي اولا: عشان معنديش نقاب اصلا انزل بيه لازم اشتريه ثانيا : ماما وبابا لسه موافقوش . كل دا عمالة تفكر ع السرير فقامت غسلت وشها واتوضت وصلت الضحي لاقت ماما صاحية محضرالها الفطار ودار الحوار الاتي : ماما : ازيك حبيبية عاملة ايه؟ حبيبة: الحمد لله كويسة يا ماما ازيك انتي ؟ ماما: الحمدلله يا بنتي هتروحي دراستك صح؟ حبيبة: اه ان شاء الله ماما: يعني شلتي فكرة النقاب من دماغك ؟؟؟؟ حبيبة: انا جبت سيرة نقاب دلوقت؟ ماما : لا انا بسألك بس عشان عارفة انك مشيلتهوش من دماغك طبعا وبالامارة قبل ما تنامي قعدتي تقري عنه برده صح ؟ حبيبة ف استغراب : عرفتي منين يا ماما ؟ ماما: العصفورة جت قالتلي , حضرتك نايمة وسايبة الجهاز مفتوح وانا دخلت ولاقت كلام عن النقاب فقريته . حبيبة: وايه رأيك يا ماما لسه كارهة النقاب برده ؟ ماما : انا مش كارهاه يا حبيبة انا بس خايفة عليكي . حبيبة : خايفة عليا من ايه بس يا ماما بالعكس دا انتي تطمني عليا وانا لابساه والله يا ماما _حبيبة عنيها بدمع _. ماما : ازاي بس طيب ودراستك ؟ هتدرسي ازاي بيه هيلبخك جدا وممكن اصلا ميرضوش يدخلوكي الكلية بيه ويشكوا فيكي او الامن يخدك ولا حاجة انتي مبتسمعيش اللي بيحصل وكره الناس للنقاب !!!!! حبيبة :بالنسبة لدراستي عادي هتبقي سهلة ان شاء الله لان انا كل اللي هعمله هغطي وشي بس مش هيأثر خالص ع تركيزي او دراستي , اما بالنسبة للامن فعادي المنتقبات بيدخلوا عادي جداااااااا فهم ممكن بيخلوا واحدة تشوف وشها عشان يتأكدوا منها بس مش اكتر ودا حقهم مفيش مشكلة . ماما : والعرسان وانتي كبرتي خلاص وبقيتي ع وش جواز لما تلبسيه ولا حد هيجي يعبرك , هم هيشوفوكي فين وانتي مغطية كل حاجة فيكي كدة ؟؟؟ حبيبة : يا ماما يا حبيبتي اتصوري ان انا عرفت ان المنتقبات دول اكتر ناس بتتجوز وبتتخطب وبيقدملها عرسان والله يا ماما متقلقيش من الناحية دي وبعدين يا ماما كل واحدة مكتوب لها من قبل متتولد العريس بتاعها وانتي اللي قايلالي كدة بنفسك يا ست الكل ( إن كل شيء قسمة ونصيب ) صح ؟ ماما : صح يا لمضة يعني انتي ناوية ع ايه دلوقت ؟ حبية فرحت اوي بسؤال ماما دا واستبشرت بيه : انتي ايه رأيك يا ماما البسه واطيع ربنا اولا وافرّح بيه النبي عليه الصلاة والسلام يوم القيامة اني بقيت اشبه امهات المؤمنين واتبعت سنته ، ثانيا وافرح واعرف اركز ف مذاكرتي وارجع زي الاول واضحك ومبقاش مضايقة وانتي كمان يا ماما انتي وبابا تفرحوا ببنتكوا حبيبتكوا وهي ان شاء الله ناجحة ومُطيعة لربنا وسعيدة وان شاء الله هيتقدملها احلي عريس يعجبكوا , ها يا ماما فرحي قلبي ؟! ماما : بتعرفي تكلي دماغي علطول يا لمضة , طيب وابوكي هتعملي فيه ايه ؟ حبيبة : البركة في ربنا ثم فيكي يا ست الكل حاولي اقنعيه وانا من ناحية وانتي من ناحية . ماما : ربنا يسهل . حبيبة : يااااااااااارب يا احلي ام في الدنيا , انا هروح الجامعة بقي يا ماما عشان متأخرش وانا راجعة ان شاء الله هشتري النقااااااااااب ماشي سلام يا حبيبتي . ماما : ف رعاية الله يا حبيبة خلي بالك من نفسك . حبيبة نازلة ع السلم مش مصدقة نفسها وبتكلم نفسها يا نهار ابيض انا مش مصدقة نفسي يارب انت كريم اوي انت عظيم اوي انا بحبك اوي يااااااااااااااارب , بس حاسة ان وشها عريان وفضلت حاطة كشكول المحاضرات ع وشها طول مهي ماشية. راحت الجامعة وقابلت صاحباتها _ اللي معظمهم زيها في الالتزام _ وكانت حكيالهم ع فكرة النقاب ودلوقت بشرتهم ان ماماتها وافقت الحمد لله عقبال بابا كمان ادعولي كتييييييير اني البسه النهاردة واجيلكوا بيه المرة الجاية . واحدة من صاحبتها _رقية_: ماشاء الله الحمد لله يارب يا حبيبة تلبسيه النهاردة يارب انا هفرحلك اوي وعارفة اصرارك دا شجعني انا كمان وحببني في النقاب . حبيية : يارب ايه رايك يا رقية نلبسه سوا تبقي حاجة جميلة اوي ايه رأيك ونكون صحبة في الله بجد . رقية : نفسي والله بس انا لسه مش قولتلهم ف البيت . حبيبة : قوليلهم بس قبل ما تقوللهم ادعي ربنا كتير اوي لان هو المُجيب سبحانه . واحدة تانية اسمها _سارة_ : ايه دا انتوا بتقولوا ايه نقاب ايه يا جماعة محنا كدة كويسين ورددت نفس كلام ماما حبيبة . حبيبة ردت عليها نفس ردها ع ماما بس دماغ سارة راكبة شمال ربنا يهديها , فقررت حبيبة تاخد رقية وتبعد عنها دلوقتي عشان مش تأثر علينا واحنا لسه ف البداية . وخلصوا المحاضرات ومروحين اهو وهم ماشين شافوا اتنين منتقبات ماشين : حبيبة : الله الله الله بصي يا رقية تحسي انهم ملكات ماشين صح .؟ رقية : اه فعلا يا حبيبة ربنا يجعلنا منهم يارب حبيبة : يااااااااااارب احنا عايزين نكون اهم حاجة مخلصين جداا لله عشان يقف معانا ويحققلنا امنيتنا . رقية : صح اهم حاجة هي الاخلاص فهو لُب العبادة . حبيبة : صح ربنا يججعلنا مخلصين له , بصي بقي يا سيتي احنا هنروح دلوقت نشتري النقاااااااااااااااااب انا فرحانة اوي يا رقية . رقية : الله يا بختك يا حبيبة عقبالي يارب هنروح دلوقت دلوقت !! بجد ! حبيبة : اه انا قلت لماما اني هشتريه . رقية : سبحان الله مُغير رأي ماماتك . حبيبة : فعلا هو الله سبحان الله مالك قلوب البشر . واشتروا النقاب وحبيبة راجعة مش مصدقة نفسها وكل شوية تفتح وتبص ع النقاب وتقوله امته هتزين وشي بقي بدل ما هو عريان كدة وكل من هب ودب بيبص عليه . ووصلت حبيبة البيت ومعاها الكنز _ كنز كل مسلمة والله _ وراجعة تعبااااااااااانة من كتر اللف فدخلت نامت من غير متكلم حد . واللي اللقاء في الحلقة القادمة ان شاء الله تكون حبيبة صحيت ونشوف هتقول ايه لبابا ووووووو
|
|
#14
2011-04-14, 09:38 PM
|
|||
|
|||
|
بارك الله فيكِ
تسجيل متابعة وفي انتظار الحلقة السادسة
|
|
#15
2011-04-16, 03:15 AM
|
||||
|
||||
|
جزاك الله خير اخيتى الكريمه
اللهم ارزقنى ونساء المسلمين العفاف والتقى ومن العمل ما ترضى
__________________
قال أيوب السختياني رحمه الله: من أحب أبابكر فقد أقام الدين، ومن أحب عمر فقد أوضح السبيل، ومن أحب عثمان فقد استنار بنور الله، ومن أحب علياً فقد استمسك بالعروة الوثقى، ومن قال الحسنى في أصحاب محمد صلى الله عليه وسلم فقد برئ من النفاق.  [align=center] 
|
|
#16
2011-04-16, 03:50 AM
|
|||
|
|||
|
الحلقة السادسة السلام عليكم ورحمة وبركاته حبيبة بابا صحيت مبسووووووووووطة جدا من نومها وقابلت ماما وسلمت عليها: حبيبة بابا : السلام عليكم امي الحبيبة . ماما : وعليكم السلام حبيبتي اخبارك ايه النهاردة شكلك مبسوطة النهاردة خير ؟ حبيبة : يااااااااااااه شفت حتة حلم رااااااااااااائع ماما : خير اللهم اجعله خير حبيبة : شفت إني ماشية في صحرا كنت خايفة اوي ومفيش حد معايا وعمالة انادي ع الناس ومحدش سامعني خالص وقعدت اذكر الله بعد كدة وانا ماشية وخايفة كدة لاقيت نسمة جت عليا وحسيت بسكينه في قلبي محستهاش قبل كدة وبعدها لاقيت قماشة نازلة من السما ونزلت اتلبست لوحدها ع وشي وغطتني , وبعدها صحيت . ماما : ما شاء الله اكيد دا النقاب طبعا , انتي ربنا بيحبك يا حبيبة .. ربنا ييسرلك الخير يا بنتي انا مش هقف في طريقك ابدااا . حبيبة : خدت ماما في حضنها وقالتلها ربنا يخليكي ليا يا ماما يا حبيبتي وان شاء الله ربنا يقدرني واقدر اسعدك انتي وبابا وتفتخروا ببنتكوا . ماما : هو دا اللي انا عايزاه يا بنتي اني اشوفك احسن بنت في الدنيا في كل حاجة , انتي اشتريتي النقاب امبارح ؟ حبيبة وهي ف منتهي السعادة : اه يا ماما وقامت جري جابته من الدولاب عشان توريه لماما . فمين خبط ع الباب (( بابا )) قامت حبيبة قلعت بسرعة النقاب بعد اما عجب ماما وشالته في اوضتها وراحت تفتح لبابا : حبيبة : ازيك يا بابا يا حبيبي معلش انا امبارح مسلمتش عليك كنت جاية تعبانة اوي من الجامعة . بابا : اهلين حبيبة بابا ولا يهمك المهم اخبار المذاكرة ايه ؟ حبيبة : اهو يا بابا هبدأ وان شاء الله هبذل كل جهدي عشان افرحك انت وماما بيا . بابا : ربنا يوفقك حبيبتي وليكي احلي هدية لو جبتي تقدير حلو . حبيبة : ربنا يخليك ليا يا بابا يا احلي اب ف الدنيا . حبيبة مش هتفاتح بابا دلوقت ف النقاب عشان هو لسه جاي وتعبان , هتخلي ماما الاول تبقي وسيط بينهم . دخلت حبيبة لماما في المطبخ تساعدها ف الطبيخ ودار الحوار الاتي : حبيبة : اعمل معاكي ايه يا ماما ؟ هاتي اعمل انا الرز عشان انا بطلعه حلو ومفلفل . ماما : ماشي يا مفلفلة انتي اعمليه بس اغسليه كذا مرة عشان لو في سوس ولا حاجة . حبيبة : ليه يا ماما متخلي السوس فيه دا مُغذي اوي ماما : هههههه , ها هتعملي ايه مع ابوكي ؟؟؟ حبيبة : بتحسي بيا علطول يا ماما , بصي انتي كلميه الاول بينك وبينه وحاولي اقنعيه وانت الكل × الكل يا قمر بعد الله طبعا . ماما : ماشي ربنا يسهل . تم الغداء ع خير مع احلي رز مفلفل من ايدين حبيبة الحبوبة ودار الحوار الاتي بين ماما وبابا : ماما : ها يابو حبيبة اخبار الشغل ايه ؟ بابا : تمام الحمد لله ماشي الحال , حاسس انك عايزة تقولي حاجة ! . ماما : فعلا يا بو حبيبة بتفهمها وهي طايرة بابا : لا قبل ما تفكر تطير اصلا . ماما : ههههههه بص يا بو حبيبة فاكر لما كنت انا وانت معترضين ع لبس حبيبة للنقاب ! بابا : اه . ماما : انا بالصدفة وهي نايمة قريت موضوع عن النقاب وعرفت فوائده للبنت وانها سُترة لها وانه اصلا فرض وووووووو_ قعدت تقوله الكلام اللي فاكراه عن النقاب وعن وفرضيته _ ويااااااااااه يا بو حبيبة بجد ربنا نزل في قلبي حب الستر والعفاف لبنتي وخلاني استبشر خير ليها في مستقلبها وجوازها . بابا : ازاي تستبشري خير يعني اصلا الموضوع منافي للاتنين مستقبل ايه مع النقاب !! وجواز ايه مع النقاب هو حد هيكون شايفها اصلا ولا هايجيلها وهي لابساه . ماما : بالنسبة لمستقبلها حبيبة اصلا شاطرة وبالذات لما بتبقي حالتها النفسية حلوة بتبدع ف مذاكرتها فلما نفرحها بموافقتنا ع النقاب دا اكبر حافز ليها , واديك شفتها الايام اللي فاتت كانت عاملة ازاي ومكشرة وحالتها النفسية وحشة وكانت مأثرة علينا وعليك انت بالذات , اما بالنسبة لجوزاها فانا سألتها برده نفس السؤال قبل كدة وردت عليا رد مقنع جدااا باختصار ( إن كل شيء قسمة ونصيب وانه كل شيء بايد ربنا ولا ايه ؟ ) بابا _ اقتنع بس لسه مش متقبل الفكرة وخايف _: ونعم بالله طبعا , طيب سيبني دلوقت يام حبيبة هدخل انام وابقي افكر ف الموضوع دا . ماما : حاضر اتفضل يابو حبيبة تصبح ع خير . حبيبة مستنية ع ناااااااااار خروج ماما من الاوضة , فخرجت ماما : حبيبة : هااااااا يا ماما الحبيبة طمنيني سبع ولا ضبع ؟؟؟ ماما : لا سبع ولا ضبع , بس بصي انا كنت حاسة وانا بكلمه انه اقتنع بكلامي وقالي هيفكر بس خير ان شاء الله . حبيبة : يارب خير ويقتنع ويوافق يارب عشان الكلية بكرة وانا خلاص يا ماما مش هخرج من البيت من غيره . ماما : ربنا يهدي الحال . حبيبة قاعدة بتذاكر بس كل شوية تسرح ف النقاب وتتخيل نفسها وهي نازلة بيه لاول مرة بس ترجع وتخاف من قرار بابا وتقعد تدعي ربنا كتييييييييير وتكمل مذاكرة . ماما وبابا قاعدين بيتفرجوا ع التليفزيون وبابا بيقلب ف القنوات لاقي الشيخ محمد حسين يعقوب وهو بيحبه فماما قامت تعمل لبابا شاي , وبابا قاعد بيتفرج ع الشيخ سمعه بيقول (( يا كل أب بتمنع بنتك من النقاب اتقي الله , لو النقاب فرض هتقدر تقف قدام ربنا وتقوله انا كنت بعارض بنتي وبمنعها من تنفيذ فرضك هتقدر ؟؟!! رد عليااااا ؟؟! ولو النقاب سُنة هيجيلك وش انك تقف قدام رسول الله صلي الله عليه وسلم وتقوله انا كنت بعارض سُنِتك ومش هخلي بنتي تنفذها ؟؟! تقدر ؟؟ امال فين حبك لله ورسوله ؟؟!!!! ....... )) ياااااااااا سبحان الله كلام جه في الجوووووون وبابا سمع الكلام واتأثر جداا بكلام الشيخ وقال لا يارب مش هقدر امنع فرض لا يا رسول مش هعارض سُنتك !. ونادي بابا ع حبيبة : بابا : يا حبيبــــــــــــه . حبيبة : نعم يا بابا . بابا من غير مقدمات : البسي النقاب يا حبيبة انا موافق . حبيبة : ايـــه ؟ بتقول ايـــــه يا بابا ؟ بجد ؟ والله ؟ البسه ؟ انت موافق ؟ ياااااااااا الله !!!! وانهمرت حبيبة في الدموووووووع بابا خد حبيبة في حضنه وقالها البسيه يا بنتي انا لا يمكن ابدا اعارض فرض ربنا او سنة نبينا عليه الصلاة والسلام . وماما سمعت عيااااااط حبيبة جت جري لاقيت حبيبة في حضن بابا وسمعت كلامه ليها وعيطت ماما هي كمان . وخلاااااااااااااااص حبيبة هتلبس النقاب من بكرة هييييييييييييييييييييييه . وصحيت حبيبة من نومها ف منتهي النشاط والسعادة وهي بتكوي النقاب كل شوية تبوسه مش مصدقة انها هتلبسه وقعدت تدعي لماما وبابا والبنت المنتقبة اللي قابلتها في الجامع وقالتلها ع النقاب . ولبست حبيبة النقاب وراحة تسلم ع ماما وبابا قبل متنزل حبيبة : ماما - بابا غمضوا عنيكوا . بابا : اهو . وريتهم شكلها بالنقاب والزي الاسلامي وهم الاتنين في نفس واحد : ربنا يحفظك يا بنتي . خرجت حبيبة من البيت بالنقاب لاول مرة وياااااااااااا ع الاحساس يااااااااه . فصحباتها منتظرينها وبالذات رقية كانت منتظراها عند باب الجامعة : رقية واقفة لاقت اخت منتقبة جاية عليها : السلام عليكم يا اختااااااااه . رقية شاكة فيها : وعليكم السلام اختي ؟ الاخت المنتقبة : انتي مش عارفاني يا رقية انا حبيبة .. حبيبة لبست النقاب يا رقية .. حبيبة مش مصدقة نفسها يا رقية .. باركي لحبيبة وعقبالك يا رقية .. رقية : وااااااااااااااو مش معقول انا بقول الصوت صوت حبيبة بس مش لاقية حبيبة استخبت تحت زي العفاف .. الله عليكي يا حبيبة .. بجد متتخليش انا فرحت اد ايه ودمعت رقية من فرحة صديقتها وانها بتتمني تكون زييها . وداخلين حبيبة ورقية الجامعة وقابلوا الشلة بتاعتهم سارة : ايه دا مين دي يا رقية؟ رقية : تتوقعوا تكون ميــــــــن ؟ كلهم : معقول تكون حبيبة !! حبيبة : هي بعينها حبيبة ايه رأيكم بقي في النيو لوك الاسلامي الجديد . سارة : انتي برده نفذتي اللي ف دماغك دا ؟ حبيبة : اه يا سارة الحمد لله والشكر لله عقبالك سارة : الله اعلم . حبيبة : تعرفوا انا ف غاية السعادة وحكيت لهم ع حلم امبارح وقعدت تكلمهم شوية ع النقاب وتحببهم فيه , وهي ماشية ف الجامعة ياااااااا كأنها جوهرة مصونة ماشية مش زي باقي البنات اللي للاسف مش مقدرين قيمة نفسهم ومش مقدرين هم قد ايه غاليين فلازم يحافظوا ع نفسهم من اللي رايح واللي جاي عمال ينهش ف جسمهم وجمال وشهم . هكذا قد لسبت حبيبة النقاب ولكن النقاب ليس هو نقطة النهاية عند المسلمة لالالالالالالالالالالا هو نقطة البداية لها **بداية طاعة الله سبحانه **بداية اتباع سنة الرسول عليه الصلاة والسلام ** بداية الدعوة لله ** بداية التخلق باخلاق المسلمة الصح ** بداية التفوق الدنيوي والدراسي ** بداية الامتحانات والابتلاءات من الله لمعرفة صدقي معه ** بداية طريق السعادة الحقيقة المتمثلة في طاعة الله عز وجل . والي اللقاء مع الحلقة الاخيرة من قصة حبيبة
وهي هتكون عن نماذج من الابتلاءات او المعوقات البسيطة التي تُقابل الاخت المنتقبة .
|
|
#17
2011-04-16, 03:50 AM
|
|||
|
|||
|
السلام عليكم ورحمة الله وبركاته ** (( الحلقة الاخيرة )) ** مواقف وطرائف وعقبات حبيبة بابا المنتقبة نبدأ رحلة العقبات ببشري لحبيبة بابا والتليفون يرررررررررررررن: حبيبة : السلام عليكم ورحمة الله وبركاته .. مين معايا ؟ المُتصل : وعليكم السلام ورحمة الله وبركاته .. انا رقية يا حبيبة . حبيبة : اهلين رقية ازيك اخبارك ايه ؟ رقية : الحمد لله بخيــــــر يا حبيبة قلبي عندي ليكي حتة مفاجأة . حبيبة : خير خير خير قولي يا قمر بشريني انا حاسة بالمفاجأة بس قولي وطمينني رقية : حبيبـــــــة انا هلبس النقاااااااااااااااااااااااااااااب باركييييييييييييييييييييلي حبيبة : وااااااااااو .. بجد ..كان قلبي حاسس بيكي يا حبي .. مبارك عليكي حبيبتي زي العفاف ..ربنا يبشرك بالخير يا رقية ويثبتك يارب . رقية : الله يبارك فيكي يا حبيبة ويجازيكي عني كل خير حبيبتي بجد انتي بعد الله اللي كان ليكي فضل كبير اوي اني احب النقاب الحب دا واني اقرر اني البسه .. ربنا يكرمك يارب . حبيبة : الحمد لله يا رقية .. ربنا بيسبب الاسباب اننا نكون علي طاعته اكتر واكتر .. الحمد لله . رقية : الحمد لله والشكر .. ماشي ياحبيبة اشوفك بكرة باذن الله ف الجامعة . الحمد لله بشري خير لحبيبة في بداية طريقها مع النقاب انها خدت بايد صاحبتها المقرّبة اليها لطريق الهداية وعشان يكونوا عون لبعض في الشدائد ان شاء الله . حبيبة قاعدة بتذاكر وهتشد جامد في المذاكرة عشان الامتحانات قربت خلاص _ اول امتحانات مع النقاب _ فتسمع حبيبة الاخبار الوحشة اللي حصلت والانقلاب عن النقاب وموقف شيخ الازهر منه فزعلت اوي وفجأة بابا نادي ع حبيبة : بابا: يا حبيبة حبيبة : ايوة يا بابا بابا: سمعتي اللي حصل في الجامعات والمدارس عن النقاب ؟ حبيبة : ايه اللي حصل يا بابا خير ؟ بابا : بيقولوا هيمنعوا المنتقبات من دخول الامتحانات بالنقاب !! حبيبة : ايــه ! مستحيل طبعا ! اكيد الخبر دا غلط يا بابا بابا: غلط ايه يا بنتي دا القرار انا لسه قاريه في الجرنان ! حبيبة ف صدمة عمرها : لا ان شاء الله دي اكيد اشاعة يا بابا انا راحة الجامعة بكرة ان شاء الله وهتأكد من الخبر دا بابا : ربنا ييسر يا بنتي حبيبة راحت اوضتها ومصدومة من كلام بابا والاخبار وقعدت تدعي ربنا كتيييييييييييييير . حبيبة كانت مستنية رقية ع باب الجامعة وهتشوفها بالنقاب لاول مرة وطبعا مش هتقولها ع الخبر الوحش اللي سمعته عشان مش تصدمها من اولها . حبيبة شافت واحدة منتقبة جاية من بعيد حست انها رقية وفعلا طلعت رقية وما شاء الله ولا قوة الا بالله شكلها بزي العفاف يشرح القلب . واتقابلوا هم الاتنين وحبيبة باركت لرقية ع النقاب وشجعتها جدااااااا عليه وحسستها بالانجاز اللي عملته . ودخلوا المدرج وطبعا صاحباتهم شافوهم هم الاتنين واستغربوا من رقية اللي انتقبت ورا حبيبة علطول فردت سارة وقالت : سارة : ايه دا ؟ انتوا بتعدوا بعض ولا ايه ؟ دا النقاب بقي عدوي دلوقت يا ماما !! حبيبة بتحاول تحبب سارة فيه: تعرفي يا سارة انا نفسي كل البنات تتعدي وتلبسه يااااااه متتخيليش فرح ربنا بينا قد ايه !! سارة : صعب يا حبيبة صعب اوي عامة الف مبروك ليكم _ بتحاول تقفّل عشان مش عايزة تسمع كتير عشان مش تتأثر_ حبيبة استأذنت منهم هتروح تشوف حاجة _ راحة تتأكد من خبر بابا بتاع منع النقاب _ راحت سألت ف شئون الطلبة وكااااااااااااااااااااااااااانت الصدمة طلع الخبر صحيح فعلا وان مفيش منتقبات هتدخل الامتحان بالنقاب ودا قرار وزاري وحبيبة ماشية والدموع عمّالة تنزل منها وبتكلم نفسها : ياربي هعمل ايه ؟ ازاي اقلع النقاب بعد كل دا ؟ ازاااي ؟ اقلعه ؟ دا مستحيل ؟؟؟ طيب هعمل ايه ؟ مش هدخل الامتحانات بعد المذاكرة دي كلها ومش هكمل تعليمي ؟؟ ازاااااي ؟ طيب هقول لبابا وماما ايه وهم نفسهم يفرحوا بنجاحي اللي وعدتهم بيه ؟؟ ورقية دي اللي لسه لابسة النقاب النهاردة هتعمل ايه ؟ يا فرحة اعداء الاسلام فينا !!! ياااااااااااااااارب كُن معنا يارب يارب دبّرني اعمل ايه وعياط وعياط ومسحت دموعها ووصلت المدرج تاني ورقية لاحظت ان حبيبة متغيرة : رقية : مالك يا حبيبة حاسة انك مضايقة ! حبيبة : ليه منا مركزّة اهو .. سيبك مني يا رقية وركزي في المحاضرة . بعد المحاضرة رقية اصّرت تعرف حبيبة مالها : رقية : قولي بقي يا حبيبة مالك انتي مش عجباني حبيبة : هقولك وربنا يستر , في قرار نزل عن منع المنتقبات من دخول الامتحانات ورحت اتأكدت منه طلع صحيح رقية : ايه ؟ لا يمكن طبعا يا حبيبة اكيد ربنا هيقف معانا متقلقيش يا حبيبة ان شاء الله ربنا هيكرمنا بس اهم حاجة احنا نثبت ع نقابنا ومش نهتز ابداااا. حبيبة في ذهول من رد وثبات رقية : الله عليكي يا رقية ما شاء الله بجد متتخيليش كلامك ريحيني قد ايه انا كنت خايفة اقولك اصلا عشان انتي لسه لابساه النهاردة . رقية : يا سلام يا حبيبة هو احنا بنلعب ولا ايه احنا دخلنا تجارة او عملنا صفقة مع العظيم سبحانه اللي لا يمكن يضيعنا ابدااااااااا وهيقف معنا وهينصرنا لما يشوف ثباتنا وعزيمتنا واصرارنا ع تكلمة مسيرة الطاعة . حبيبة : ربنا يكملك بعقلك وايمانك يا رقية .. بجد كلامك زي البلسم ع قلبي ومعاكي حق ان شاء الله ثابتين طبعا . حبيبة وصلت البيت مستبشرة بكلام رقية ودخلت فتحت موقعها المُفضل الطريق الي الله عشان تشوف كلام الشيوخ عن الموضوع دا وموقف المنتقبات منه فما شاء الله لاقت خطبة د\ حازم والشيخ جلال والشيخ هاني عن نفس الموضوع وسمعتها وطمأنتها وثبتتها اكتر واكتر ومواقف المنتقبات والموضوع الرائع : (( همسة في اذن كل منتقبة )) المشكلة دلوقت في بابا وماما هتقولهم ايه حبيبة ماما : ازيك يا حبيبة اخبارك ايه واخبار الجامعة والخبر الوحش اللي ابوكي قاله دا ؟؟ حبيبة : الحمد لله يا ماما تمام وبالنسبة للخبر هو للاسف صحيح انا سألت . ماما : طب وبعدين هتعملي ايه ؟ هتقلعيه طبعا وقت الامتحان وخلاص وبعد كدة البسيه حبيبة : يا ماما انا عمري ما هفكر اقعله ابدا , بس ربنا يسهل يا ماما ان شاء الله انا حاسة ان ربنا هيقف معانا وهيلغوا القرار دا , اصله كدة ظلم اوي ازاي يسيبوا المتبرجات يدخلوا عادي ويضربلهم تعظيم سلام واحنا اللي يمنعونا _ دا حاجة تقرف _ ماما : عندك حق يا بنتي مهو كدة علطول الحاجة الحلوة هي اللي بتتحارب . حبيبة : صح يا ماما الحق والباطل هيفضلوا في صراع دائم الي يوم القيامة . الامتحانات بتقرب ..بتقرب وحبيبة ورقية يتفقوا انهم متوكلين علي الله وفكروا بعض بالاية : (( أليس الله بكافٍ عبده )) وانهم هيعملوا اللي عليهم لآخر لحظة وهيذاكروا وهيجتهدوا ف المذاكرة واللي ربنا كاتبه هو اللي هيكون غصب عن اي حد واي قرار . والامتحانات خلاص هتبدأ بكرة وحبيبة خايفة بس خوف طبيبعي عشان الامتحان والاكبر هو دخولها اصلا ولكنها متوكلة ع الله واخدت سيل من الدعوات من ماما وبابا وربنا معاكي يا حبيبة . حبيبة داخلة الجامعة بكل ثقة فظابط الأمن وقفها : خير ؟ راحة فين يا انسة ؟ حبيبة : عندي امتحان وداخلة امتحن . عم الظابط : تقريبا احنا علقنا يافطة كبييييييييييرة ومكتوب فيها ممنوع دخول المنتقبات الامتحان الا لو قلعته , هل انتي ناوية تقليعه ؟ حبيبة غيرت الموضوع وقالت : هو تقريبا ممنوع من دخول القاعة مش الجامعة نفسها صح ؟ عم الظابط : ايوة حبيبة : طيب ممكن ادخل الجامعة الحق اراجع قبل الامتحان !؟ قالها اتفضلي وهو مستغرب حبيبة داخلة وعلي يقين تام ان ربنا هيدخلها الامتحان وهتمتحن وهتحل كويس جدا ومن غير ما تقلع النقاب ازاااااااااي معرفش سبحان الله دخلت القاعة ومحدش كلمها ولا قالها حاجة ولا اي حاجة ولا محتاجة سبحانك يااااااااارب وحبيبة خارجة يااااااااااااااااا ع الفرحة اللي هي فيها زي ما كانت واثقة بالظبط كله اتحقق ازززززززاي بقدرة الله سبحانه واخلاص حبيبة وثباتها والحمد لله عدت الامتحانات كلها علي خيــر وكانت فترة اختبار كبير اوي لحبيبة اختبار تعليمي + الاختبار الاكبر وهو اختبار ديني والحمد لله نحجت فيهم . ودا كان اول موقف تتعرضله حبيبة مع النقاب . نيجي لتاني موقف ولكنه خليه بعد الفاصل ان شاء الله فاصل ونواصل تابعووووونااااااا
|
|
#18
2011-04-16, 03:51 AM
|
|||
|
|||
|
(( تاني موقف من مواقف حبيبة مع النقاب )) حبيبة بابا قرت طبعا مواصفات الزي الشرعي وانه الافضل يكون غامق يميل الي السواد فحصل الموقف الاتي : ماما كانت مجمعة الجيران عندها بيعملوا محشي مع بعض وكانت حبيبة برا كانت بتحضر درس علم فخلص الدرس وجاءت حبيبة ع البيت ودار الحوار الاتي : حبيبة : السلام عليكم ازيكم جميعا .. مجمعين عند النبي إن شاء الله . الجيران : وعليكم السلام ازيك يا حبيبة .. ايه يا بنتي دا انا اتخضيت منك من السواد دا .. يا بنتي انتي لسه صغيرة وفي عز شبابك .. دفنتي نفسك ليه كدة تحت الاسود دا .. اعوذ بالله ..!! حبيبة :اعوذ بالله ايه طنط انتي شفتي عفريت ولا ايه ؟! يا طنط دا الاسود مُريح جداا .. وشيك وقيّم غير باقي الالون الخلطبيطة التانية . الجارة ام محمد: طيب ما انتي كنتي بتلبسي الخلطبيطة دي وكنتي بتبقي شيك برده ايه اللي حصل بقي والاكتئاب بتاع الاسود دا ؟! حبيبة : اه يا طنط فعلا كنت بلبس الوان قبل كدة بس مكنتش اعرف ان الافضل عند ربنا هو اللبس الغامق عشان مش يحدد معالم جسم المرأة وعلي فكرة مش شرط اسود بس لا طبعا ممكن بني او كحلي او زيتي او لون اي غامق مش مُلفت بس انا بحب الاسود . الجارة بتبص لحبيبة باستغراب وكملت حشي المحشي بدل متحشي مخ حبيبة . بعد مهرجان وهيصة المحشي كل جارة راحت علي بيتها ومع الف سلامة _ عشان كمان لفتوا نظر ماما وحشوا مخها مع المحشي بموضوع الالوان دا _ : ماما : طيب يا حبيبة ما ام محمد عندها حق ايه الاسود اللي انتي بقيتي لازقة فيه كدة علطول !! وكل عباياتك الملونة اللي كانت عندك هتترمي بقي ان شاء الله ؟! حبيبة : لا يا ماما طبعا مش هتترمي ان شاء الله هلبسها في اي مناسبة او كدة ووعد مني ليكي يا ماما يا حبيبتي يوم نتيجتي هلبس واحدة فيهم ايه رايك بقي يا قمر ! ماما : برده خدتيني في دوكة يا لمضة يا لئيمة وغيرتي الموضوع لموضوع انا نفسي فيه اني اشوفك ناجحة بتفوق واحلي عروسة يارب يابنتي . حبيبة : يارب يا ماما يا حبيبة قلبي . وعدا الموقف التاني علي خير والحمد لله والمحشي كان تحفففففففففففة . انتظروا الموقف التالت
|
|
#19
2011-04-16, 03:52 AM
|
|||
|
|||
|
( الموقف الاخير لحبيبة بابا ) ويمر كام شهر من امتحانات حبيبة فالنتيجة خلاص ع وشك وحبيبة قاعدة ع نار وقلقانة وخايفة ولكنها واثقة ف ربنا طبعا . فالنتيجة تطلع ع النت ورقية بتتصل بحبيبة : رقية : ها يا حبيبة طمنيني عملتي ايه ؟؟؟؟ حبيبة : عملت ايه ؟؟ هي طلعت ولا ايه خلاص ؟؟ رقية : ايوة يا حجة طلعت ع النت شوفيها بسرعة وطمنيني . حبيبة : يا نهاررر .. طيب انتي عملتي ايه يا رقية طمنيني ..؟ رقية : الحمد لله جبت جيـــــد مع اني كنت خايفة مجيبش تقدير بس سبحان الله اكيد بركة النقاب . حبيبة : مبارك حبيبتي رقية عقبالي يارب اما افرح وافرح اهلي يارب انا هروح اشوفها بقي اوك ادعيلي ربنا يستر فماما كانت سامعة المكالمة وقلقانة جداااااااااااااا وحبيبة قالت لماما خليكي انتي هنا في الصالة يا ماما وانا هروح اشوفها ع النت واجي اطمنك وابشرك واهو دخّلت اسمها ورقم الجلوس وخلاص صفحة النتيجة اهو هتفتح , وحبيبة مغمضة عنيها وقلبها بيدق جداااااااا , وفتحت عينيها لاقت البشارة امتياااااااااااااااااز الله اكبر الله اكبر وحبيبة تنهمر ف العياط من الفرحة يا الله .. كم انت كريم .. كم انت شكور ..كم انت عظيم .. بحبك اووووووووي ياااااااااااارب . يا ماما .. يا ماما .. يا ماما .. يا ماما .. زغرطي يا ماما افرحي يا ماما .. ابشري يا ماما .. امتيااااااااااااااااز يا ماما . وماما تدمع من الفرحة وخدت حبيبة ف حضنها وهم الاتنين يعيطوااااااااااااااااااااا . حبيبة : شوفتي يا ماما مش انا قولتك ان ربنا كريم اوي وهيكرمنا اوي لما نطيعه , واهو كرمنا اخر كرم والحمد لله . ماما : ونعم بالله .. الحمد لله يارب احمدك ياربي واشكرك وماما مش قادرة تتكلم من الفرحة . وبابا يجي من شغله وسط الموقف الرائع دا بابا : خير انا سامع صوتكوا من ع السلم خير ؟ حبيبة : حظر فزر يا بابا العزيز بنتك هتفرحك بايه ؟؟ بابا : احظر .. افزر .. ايه النتيجة طلعت ؟! حبيبة : اه يا بابا طلعت وباعلي صوتها جبت امتياااااااااااااااااااااز يا بابا . بابا شنطة الشغل وقعت منه من الفرحة : والله بجد يا حبيبة ! حبيبة : اه والله يا بابا افرح يا بابا انت وماما والله انتوا تستاهلوا كل خير , انا قعدت ادعي ربنا اني اجيب تقدير حلو عشان افرحكوا انتوا قبلي والله واهو الحمد لله ربنا اداني احلي واعلي تقدير . بابا : يا حبيبتي يا بنتي وخدها في حضنه وماما دخلت معاهم وكلهم خدوا بعض ف حضن بعض . ما اجمل طعم النجاح في ظل طاعة الله !! ما احلي ان يذوق الانسان ثمرة تعبه طوال الوقت !! ما احلي ان يكون المسلم مُطيع لله + متميز ف الدنيا !! اسرة حبيبة الفرحة مش سايعاهم فهيعملوا عزومة كدة ع الضيق انطلاقا من : (( قل بفضل الله ورحمته فبذلك فليفرحوا هو خير مما يجمعون )) العزومة هيدعوا فيها اخت حبيبة المتزوجة المسافرة برا مع زوجها واولادها واهي فرصة للم الشمل , وجاءت اخت حبيبة بالسلامة هي واسرتها ويباركوا لحبيبة ع النجاح الباهر وفي هذه العزومة يحصل الموقف الاتي : حبيبة واختها وماما طبعا بيحضروا احلي اكل واحلي حلويات , وجاء موعد الغداء طبعا كلهم قاعدين بيكلوا ما عدا حبيبة ليـــه ؟ مين شاطرة هتقول علطول ؟! طبعا عشان حبيبة منتقبة وزوج اختها قاعد بيأكل معاهم فحبيبة كلت في اوضتها وخلصت اكل وراحت المطبخ وطبعا عارفة ومتأكدة انهم كلهم بيكلوا جوا فمش لابسة الاسدال ولا النقاب . فايه اللي حصل بقي وهي في المطبخ ؟! صلوا ع النبي الاول عليه الصلاه والسلام زوج اختها عارف او معتقد ان حبيبة ف اوضتها فجاي يغسل ايده بعد الاكل ومُتجه الي المرحاض فطبعا حبيبة اتخضت جداا انها حست ان هو جاي وهي مش لابسة الادوات , فراحت قفلت نور المطبخ بسرعة واستخبت تحت الحوض لحد مهو يمشي , فبعد اما خلص غسل يداه فحضرته عايز يشرب فدخل المطبخ عشان يشرب من التلاجة , وحبيبة مرعوبة جداااااا يشوفها ولو حتي ف الضلمة كدة ممكن يحسبها عفريت قاعد تحت الحوض , فالمهم هو فتح التلاجة بس مفتحش نور المطبخ وجاب الازازة وهو بيشرب اتخايل بحاجة غريبة تحت الحوض فاستغرب وكان لسه جاي يشوف ايه دا , فحبيبة راحت قايله انا انا خليك مكانك ,فلاقت دا راح رمي الازازة واتخض حتة خضة _ كان بيحسبها عفريت فعلا _ . وبعدها طلع جري ههههههه احسن عشان يحرم انه ميتأكدش ان في حد جوا ولا لأ هي سايبة ولا ايه ؟؟؟ نتعلم من هنا درس بسيط : طالما يا اخت يا منتقبة عندك حد غريب ف بيتك يبقي نقابك ميفارقكيش ابداااا ومتقوليش بقي دا زوج اختي دا قريبي لالالالا مفيش نقاش ف الموضوع دا اوك عشان متنزليش تحت الحوض زي حبيبة كدة . ونجحت حبيبة نجاح باهر والحمد لله وهي واسرتها دلوقت ف منتهي السعادة . وحبيبة كانت بتصلي الجمعة في الجامع واثناء الخطبة لاحظت حبيبة ان سيدة كبيرة عمالة تبص عليها من اول ما الخطبة بدئت , فبعد انتهاء الصلاة هذه السيده ندهت ع حبيبة ودار الحوار الاتي : السيده : السلام عليكي يا بنيتي ؟ حبيبة : وعليكي السلام ورحمة الله وبركاته السيده : ممكن معلش اخد من وقتك ثواني ؟ حبيبة : اتفضلي يا طنط . السيده: هو انتي مرتبطة او مخطوبة او كدة ؟ حبيبة اتسكف ووشها احمّر : لا يا طنط . السيده : طيب الحمد لله بصي يا بنتي انا بدور لابني ع عروسة وحاسة انك عروسة ابني مش عارفة ليه , انا ابني ملتحي وحافظ كتاب الله ومهندس ونفسه ف عروسة ملتزمة زيك كدة ايه رايك يا بنتي ؟ حبيبة مش عارفة تقول ايه ولا تعمل ايه من الدهشة والكسوف والموقف كله : والله يا طنط انا مش عارفة اقول لحضرتك ايه وبصت ف الارض . السيده : انا عارفة انك محرجة بس انا صدقيني ارتحتلك اوي ففيها ايه لما تجربي .. ممكن العنوان او رقم تليفون بابا ؟؟!! حبيبة : طيب اتفضلي يا طنط رقم بابا . وخلص الحوار مش مصدقة وروحت البيت وحكت لماما ماما : بجد والله .. ربنا يكرمك يا بنتي ويجعلك ف الطيب نصيب واشوفك احلي عروسة . وماما قالت لبابا ع الموقف وبابا برده فرح وربنا يسهل وفجأة تليفون بابا يرن وقلب حبيبة يدق جامد وطلعت جري تسمع المكالمة : بابا: السلام عليكم .. مين حضرتك ؟ المُتصل : وعليكم السلام .. انا اللي والدتي اتكلمت مع بنت حضرتك ف المسجد . بابا : اهلا وسهلا . العريس : اهلا بحضرتك ممكن اجي البيت امتي ؟ بابا بيبض لحبيبة وابتسم : اتفضل يابني .. يوم الجمعة بعد العشا مناسب لك ؟ العريس : اه مناسب ان شاء الله شكرا جدا لحضرتك . وانتهت المكالمة وبابا فرحان جدا ببنته حبيبة قلبه اخر العنقود حبيبة الحبوبة هتقبي عروسة وقالها يلا حضر نفسك يا جميل يوم الجمعة وماما تخد حبيبة ف حضنها وف منتهي الفرح , وجه يوم الجمعة وحبيبة حضرت نفسها وخلت البيت ع سنجة عشرة وجرس الباب يرن وقلب حبيبة يرن معاه , بابا فتح وسلم ع العريس وقاله اتفضل ف الصالون اهلا وسهلا وقعدوا يتكلموا شوية ودخلت ماما القت السلام عليه ورحبت بيه وقعدوا شوية كدة وجاااااااااء دور العروسة وحدثت المقابلة الشرعية وانتهي اول لقاء وهتبدأ صلاة الاستخارة مباشرة _ مش بعد اما اخد القرار انا _ وبعدها حست حبيبة بقبول وشافت فيه الشخص اللي بتتمناه وماما وبابا برده وافقوا عليه موافقة مبدئية ولكن لسه هو موافقته , فالتليفون يرن وماما ترد : ماما: السلام عليكم .. مين حضرتك المتصل : وعليكم السلام .. انا والدة العريس ماما : اهلا وسهلا الوالدة : اهلا بيكي اهلا بوالدة عروسة ابني, من ساعة ابني ما جه عندكوا البيت وهو مبسوط وصلي استخارة وارتاح اوي لحبيبة .. فممكن نيجي البيت مرة تاني ولا ايه موقف حبيبة ؟ ماما _ في فرحة شديدة _ : اهلا بيكم تنوروا وابنك ما شاء الله مهذب واخلاق وملتزم. الوالدة : طيب ع خيرة الله .. ربنا يوفقكم يارب . وماما بتبشر حبيبة بالمكالمة الجميلة والدنيا مش سايعاهم وكل اللي حبيبة بتقوله بس : انت كريم اوي يارب . انت شكور اوي يارب انت عظيم اوي يارب . انا بحبك اووووووووووووي يارب . ويتحدد معاد لخطوبة حبيبة الحبوبة وتدخل ع موقعها المفضل عشان تشوف طرق الفرح الاسلامي فلاقيت موضوع هايل : فرحي اسلامي ..ليه شكل تاني  وكانت احلي خطوبة اسلامية لذيذة وخلاااااااااااااص توتة توتة .. خلصت الحدوتة حدوتة حبيبة بابا مع الالتزام واثر وفضل الالتزام عليها ارجوا ان تكونوا قد استمتعوا مع القصة اقتباس: <table width="100%" border="0" cellpadding="6" cellspacing="0"> <tbody><tr> <td class="alt2" style="border: 1px inset;"> ومطلوب من كل اخت قرأت القصة من اولها لاخرها </td> </tr> </tbody></table> اقتباس: <table width="100%" border="0" cellpadding="6" cellspacing="0"> <tbody><tr> <td class="alt2" style="border: 1px inset;"> ان تقول لنا اي حاجة استفدتها منها في جملة واحدة فقط </td> </tr> </tbody></table>  و 
|
 |
| أدوات الموضوع | |
|
|
