بحبك يا مصر

[ام عبدالرحمن]

هاكتبلك عن إيه يا بلادي
هاكتبلك عن إيه ؟
بحلملك بربيع مش عادي
وبنادي يا بلادي عليه

مش قادر على حيلي اقوم
وبواسي ف حلمي المهزوم
وفي عيني دمعي المكتوم
على بكرة يزعق وينادي

علي عيني مش قادر اساعد
ولا قادر مع بكرة اتواعد
وادي حلمك منك بيباعد
كان حلمك حلم لأولادي

على عيني وجعك ودموعك
والعطش اللي ماليكي وجوعك
والسخط اللي في كل ربوعك
واليأس بينهش في الوادي

كان أملي أساعد وياكي
أحلامي ألاقيها معاكي
وعموما انا هستناكي
وحياتي يا حبيبتي فداكي

مش يائس لكن مصدوم
متعاطف مع جيل محروم
مش عاوز السخط يدوم
ولا نرجع لبيادة وكاكي

مش عاوز ازهق واسافر
ولا يشمت في بلادي الكافر
انا باقي فيكي وهعافر
على أرضك وفي ضل سماكي

انا باقي فيكي ومش ماشي
لو حتى الحال مش ماشي
وان حلمي يا حبيبتي مجاشي
راح اموت مدفون جواكي

خالد الشافعي

[نداء الإيمان]

جزاكم الله خيراً أختى