|
| جديد المواضيع |
|
|||||||
 |
|
|
أدوات الموضوع |
|
#1
2013-06-20, 07:09 PM
|
|||
|
|||
هــل انـــت كـــــــــذاب ؟؟؟؟؟
بسم الله الرحمن الرحيم والحمد لله رب العالمين والصلاه والسلام على سيد الاولين والاخرين محمد وعلى اله وصحبه اجمعين وبعد اليوم ان شاء الله هنتكلم عن خلق ذميم دميم قبيح عن صفه من صفات النفاق عن شى هو راس كل خطيئه وبدايتها عن شى اقصر الطرق الى النار هــنــتــكـــلــم عــن الــكـذب  فيا ترى ايه هو الكذب ؟؟ معناه ايه ؟؟ الكذب يا جماعه هو ان يقول الانسان كلاما خلاف الواقع يــعــنــى ايــه الــكـــلام ده بــرضـو ؟؟ هنضرب امثله ونفهم اكثر يعنى مثلا ... واحد جالك البيت كان عاوزك فانت تقول لاخوك او ابنك الصغير قوله مش قاعد يبقى انت كده كذاب لانك خالفت الواقع لانك فى الحقيقه موجود او مثلا .. واحده صحبتك اتصلت بيكى فى التلفون فانتى تخلى حد يرد وتقوليله قولها فلانه مش موجوده يبقى انتى كده كذابه لانك خالفت الواقع لانك فى الحقيقه موجوده او مثلا .. الام تكذب على بنتها او ابنها علشان تسكته تقوله اسكت وانا هجيبلك كذا او هعملك كذا او هعطيك كذا وهى مش فى نيتها تعمله الحجات دى . هى بس بتقول كده علشان تسكته ده يا جماعه كذب اسمع حديث النبى صلى الله عليه وسلم عن عبد الله بن عامر رضى الله عنه انه قال دعتني أمي يوما ورسول الله -صلى الله عليه وسلم- قاعدٌ فى بيتنا فقالت ها تعال أعطيك، فقال لها رسول الله -صلى الله عليه وسلم وما أردت أن تعطيه؟ قالت أعطيه تمرا، فقال لها رسول الله -صلى الله عليه وسلم أما إنك لو لم تعطه شيئاً كُتبت عليك كذبة رواه أبو داود . واحد من اصحاب النبى بيقول امى ندهت على وكان النبى قاعد فى بيتنا فقالتلى امى تعالى وانا اعطيك حاجه فالنبى قال لامى وهتعطيه ايه ؟؟ فقالت اعطيه تمرا فالنبى قالها لو انك لم تعطه شيى هتتكتب عليك كذبه يا الله .. والله مش ممكن للدرجه دى ؟؟؟ ايـــوه والله فى اغلبيه بيوتنا الامهات تكذب على اولادها علشان تسكتهم وكان الامر عادى ومباح ولكن لا والله كل ده هيتكتب انه كذب وفى الاب اللى يكذب على ولده علشان يرضيه ده كـــذب وبعدين ازاى بعد كده هنعلم اولادنا الصدق وهما بيشوفونا بنكذب ؟؟؟ بتشوفك يا اختى بتكذبى على ابيها ؟؟ ازاى بعد كده هنعلمهم الصدق ؟؟ ولو احنا تدبرنا ونظرنا لحياه الناس نظره فاحصه مدققه هنلاقى اغلبيه احوال الناس كــذب فـــى كــذب هنلاقى حاكم يكذب على شعبه هنلاقى الاف من الشباب من الشعب يخرجوا فى مظاهرات علشان يقتلوا ويخربوا ويحرقوا ويدمروا ويدعوا بالكذب انهم خارجين علشان ينشروا الحريه والديمقراطيه وفى التاجر اللى بيكذب على زباينه واحد بيقول سباك قاللى ان الشخص اللى علمه الصنعه قاله يا بنى علشان تكسب لازم تكذب والله ما هيكسب ولو كسب فى الدنيا بكذبه مش هيكسب فى الاخره يوم لا ينفع مال ولا بنون الا من اتى الله بقلب سليم فى الوالد اللى بيكذب على ولده وفى الابن اللى بيكذب على ابيه فى الزوجه اللى بتكذب على زوجها وفى الزوج اللى بيكذب على زوجته والله يا جماعه لو تدبرنا حياه الناس لهنلاقى اكثر اقوالهم وافعالهم كذب فى كذب كله بيكذب على كله وكله بيخدع كله كم من الدماء التى سفكت بسبب الكذب كم من مقدسات دنست بسبب الكذب كم من دول احتلت بسبب الكذب ممكن بيت يدمر بسبب اخبار كاذبه ممكن انسان يسجن طول عمره بسبب كلمات كاذبه واخبار كاذبه والله ازمه العالم دلوقتى ازمه صدق تلاقى تصريحات ومنشيتات واخبار واقوال كذب فى كذب تلاقى زعيق وصراخ وهتافات واعلام يروج اشاعات كاذبه ويزيف الحقائق كذب فى كذب مفيش صدق كله كذب وفى الناس الكاذبه فى نيتها .. يعنى يقصد بنيته فى عمله غير وجه الله عز وجل والدليل على كده حديث الثلاثه اللى هتسعر بيهم النار يوم القيامه الشهيد والمنفق والعالم كل واحد من دول يدعى بالكذب ان عمله كان لوجه الله عزوجل ولكن ربنا عز وجل يقول لكل منهم كذبت يقول للشهيد قتلت ليقال جرى فقد قيل واحد يشارك فى حرب او جهاد علشان الناس تقول عليه ده فلان ده بطل شجاع مغوار جرى مكنش طالع لله مكنش طالع علشان تكون كلمه الله هى العليا مكنش طالع علشان ينصر دين الله هو كاذب فى نيته .. كذاب والمنفق ربنا عز وجل يقول له كذبت .. تصدقت ليقال جواد واحد بيتصدق بمال مكنتش الصدقه دى لله لا علشان الناس تقول عليه جواد كريم والعالم ربنا يقوله كذبت ولكن تعلمت ليقال عالم .. واحد ربنا من عليه بالعلم واتعلم العلم مكنش العلم اللى بيعلمه للناس مكنش لوجه الله هو اتعلم العلم علشان الناس تقول عليه فلان عالم وتمدحه وتثنى عليه وفى الكذب فى المدح واحد يمدح فى واحد بالكذب يقول ده فلان كريم وشجاع ورائع ومن اصل طيب وكذا وكذا هو بيقول كده علشان ينول وجاهه عند الشخص اللى بيمدحه فيمدح فلان ده باشياء لا يستحقها يجعل الجبان شجاعًا والبخيل كريمًا ليه طيب كده ؟؟؟ علشان تتقرب منه ؟؟ والله ما هينفعك فى الاخره ولا هيشيل عنك والشخص اللى بيمدح فلان ده بالكذب منافق والنبى يا اخواتى حذر اناس منافقين بيمدحوا اللى قدامهم بالكذب فقال صلى الله عليه وسلم إذا رأيتم المداحين فاحثوا في وجوههم التراب والحديث رواه مسلم وفى ناس تكذب علشان تعظم نفسها قدام الناس اسمع الحديث ده .. كما قالت أسماء ذات النطاقين رضي الله عنها جاءت امرأة إلى النبيِّ صلى الله عليه وسلم وقالت يا رسول الله: إحدانا تتظاهر بأن زوجها يعطيها كذا وكذا؛ لتضارَّ ضرائرها. تقول: إنَّ زوجي آتاني بكذا وأعطاني كذا، وصنع لي كذا، وقال لي كذا. وما صنع لها شيئًا من ذلك، وإنما مكايدة لضرائرها ومفاخرة، فقال النبيُّ صلَّى الله عليه وسلَّم: "المتشبِّع بما لم يُعْطَ، كلابس ثوبي زور. كالَّذي يلبس ثوب زور ليس له، بل هو ثوب غيره. السيده اسماء رضى الله عنها بتقول واحده جاتت للنبى صلى الله عليه وسلم وقالت له ان فى مننا تتظاهر بان زوجها بيعطيها كذا وكذا علشان تغيظ اللى قدامها وتقول زوجى جبلى كذا واعطانى كذا وصنع لى كذا وفى الاصل زوجها مش عطاها اى حاجه ولكن هى بتقول كده علشان تكيد اللى قدامها وتغيظه وتفتخر قدام ضرتها فالنبى قالها المتشبع يعنى المتزين بحاجه ومعندهوش الحاجه دى اصلا وبيستكثر بيها ويتزين بيها بالباطل فهو مذموم كما يذم من لبس ثوبى زور يعنى كالكاذب القائل ما لم يكن كالَّذي يلبس ثوب زور ليس له، بل هو ثوب غيره. والحديث متفق عليه وفى واحد يكذب فى الرؤيا يعنى ايه الكلام ده ؟؟؟ يعنى مثلا واحد يحكى لصاحبه ويقوله ده انا شوفت رؤيا الليله اللى فاتت فيها كذا وكذا وحصلى كذا وكذا ويكون كلامه كذب فى كذب كلامه مش صح لا شاف رؤيا ولا حصله اللى حكاه هو كده كذاب والنبى صلى الله عليه وسلم قال من تحلم كاذبا كلف يوم القيامة أن يعقد بين شعرتين ولن يعقد بينهما حديث حسن صحيح عن عكرمة عن بن عباس يعنى اللى هيقول حلمت حلم كذا وفيه كذا وهو كذاب ربنا يوم القيامه هيكلفه ويخليه يعقد حبتى شعير يوم القيامه وطبعا ده استحاله يحصل مش ممكن يقدر يعقد بتين مع بعض وده يا جماعه نوع من انواع العذاب وعن ابن عمر أن رسول الله صلى الله عليه وسلم قال من أفرى الفرى أن يري الرجل عينيه ما لم تريا رواه البخاري يعنى اكذب الكذبات ان واحد يقول انا شوفت فى منامى كذا وكذا وهو مشفش حاجه فى منامه ومفيش حاجه يا اخواتى اسمها كذب ابيض وكذب اسود او كذب صغير او كذب كبير فكل الكذب مكروه منبوذ والمسلم هيتحاسب على كذبه ويعاقب عليه حتى ولو كان صغير اسمع الحديث ده عن اسماء بنت يزيد قالتيا رسول الله ان قالت احدنا لشى تشتهيه لااشتهيه يعد ذلك كذبا؟ قال رسول الله صلى الله علية وسلم ان الكذب يكتب كذيبا، حتى تكتب الكذيبة كذيبة والحديث رواه مسلم السيده اسماء رضى الله عنها بتقول للنبى لو حد فينا قال على حاجه بيحبها مش بيحبها يعتبر كذب ؟؟؟ فالنبى قالها ان الكذب يكتب كذيبا والكذيبه تتكتب كذيبه يعنى كله هيتكتب كذب طالما الانسان قال حاجه خلاف الواقع اسمع بقى الكلام اللى جاى ده كويس علشان تشوف الكذاب وضعه ايه والله يا اخواتى ثم والله اللى واقع فى الكذب ويتكلم بالكذب بيتقلب فى النفاق ومع المنافقين وهو مش عارف مش واخد لباله !! يا الهى سلم سلم اسمع لحديث النبى صلى الله عليه وسلم عن أبي هريرة رضي الله عنه آية المنافق ثلاث إذا حدث كذب وإذا وعد أخلف وإذا اؤتمن خان رواه البخارى ومسلم يا الله اول صفه من صفات المنافقين اذا حدث كذب فى روايه تانيه عنعبد الله بن عمرورضي الله عنهما عن النبي - صلى الله عليه وسلم قال أربع من كن فيه كان منافقا ، ومن كانت خصلة منهن فيه كانت فيه خصلة من النفاق حتى يدعها من إذا حدث كذب وإذا وعد أخلف ، وإذا خاصم فجر ، وإذا عاهد غدر اخرجه البخارى ومسلم النبى بيقول اربع صفات اللى هتتوافر فيه الصفات دى هيبقى منافق خالص واللى فى صفه من الصفات دى هيكون فيه صفه من صفات النفاق حتى يتركها من إذا حدث كذب وإذا وعد أخلف ، وإذا خاصم فجر ، وإذا عاهد غدر يعنى الكذاب اللى بيكذب على الناس منافق فيه صفه من صفات النفاق وكمان الكذب يا اخواتى من اقصر الطرق اللى بتودى للنار اسمع النبى صلى الله عليه وسلم قال ايه ؟؟؟ عن الأعمش عن أبي وائل عن عبد الله قال : قال رسول الله صلى الله عليه وسلم إياكم والكذب فإن الكذب يهدي إلى الفجور،وإن الفجور يهدي إلى النار،وإن الرجل ليكذب ويتحرى الكذب حتى يكتب عند الله كذابا رواه البخارى ومسلم يعنى الكذب يوصل الانسان للفجور والفجور يوصل الانسان للنار .. واراجل يفضل يكذب كذبه وراء كذبه وراء كذبه لغايه ما يتكتب عند ربنا كذاب ياااااااااه تخيل كده ؟؟ انك عند ربنا مكتوب من الكذابين ؟؟؟ انت كنت بتدارى كذبك على الخلق فى الدنيا ولكن عند الخالق مكتوب كذاب واسمع الحديث ده علشان تعرف اد ايه الامر خطير فقد سئل النبى صلى الله عليه وسلم قيل يا رسول الله أيكون المؤمن بخيلا قال: نعم، قالوا أيكون المؤمن جبانا، قال: نعم، قالوا أيكون المؤمن كذابا قال: لا؟ رواه الامام مالك فى الموطا يعنى ممكن المؤمن يكون جبان او بخيل ولكن ميكنش كذاب ابداا وكان الشخص اللى بيكذب ده ميعتبرش مؤمن والكذب يا اخواتى كان من ابغض الاخلاق للنبى صلى الله عليه وسلم فكان النبى يكره الكذب فقد قالت السيده عائشه رضى الله عنها وارضاها ما كان خلق أبغض إلى النبي محمد من الكذب ولقد كان الرجل يحدث عند النبي بالكذبة فما يزال في نفسه حتى يعلم أنه قد أحدث منها توبة سنن الترمذى فالكذاب يا اخواتى مش بيقدر يدارى كذبه او ينكره لان الكذب هيظهر عليه والكذاب ده مسيره هيتكشف والله العظيم هيتكشف انه كذاب وكمان الكذاب ده محدش هيصدقه فى حاجه ابدا حتى ولو كان صادق لان الانسان طالما كذب مره وراء مره والناس تعودت على ان فلان ده كذاب فان جه بعد كده وكان صادق فى كلامه محدش برضوا هيصدقه لان الناس تعودت على الكذب منه تعالوا نشوف القصه دى يحكى أن طفلا كان كثير الكذب، سواءً في الجد أو المزاح، وفي إحدى المرات كان يسبح بجوار شاطئ البحر وتظاهر بأنه سيغرق، وظل ينادي أصحابه: أنقذوني أنقذوني.. إني أغرق. فجرى زملاؤه إليه لينقذوه فإذا به يضحك لأنه خدعهم، وفعل معهم ذلك أكثر من مرة. وفي إحدى هذه المرات ارتفع الموج، وكاد الطفل أن يغرق، فأخذ ينادي ويستنجد بأصحابه، لكنهم ظنوا أنه يكذب عليهم كعادته، فلم يلتفتوا إليه حتى جري أحد الناس نحوه وأنقذه، فقال الولد لأصحابه: لقد عاقبني الله على كذبي عليكم، ولن أكذب بعد اليوم. وبعدها لم يعد هذا الطفل إلى الكذب مرة أخري. والكذب يا اخواتى ليه انواع فى كذب على الله وفى كذب على رسول الله وفى كذب على الناس الكذب على الله هو ابشع صوره من صور الكذب .. انك تكذب على ربنا دى كارثه ايه ده وهو فى حد بيكذب على ربنا ؟؟؟؟؟ اه فـــى طيب ازاى ؟؟؟؟ فى ناس بتحلل وتحرم على حسب اهوائها على مزاجها مش بحسب الشرع اللى ربنا منزله فيحرم الحلال ويحلل الحرام فلان المعروف اللى بيجى على فضائيه معروفه ويتجرا على الفتوى بدون علم وبدون دليل وبدون بينه ويكذب على ربنا يحلل القبلات بين الشباب والفتيات فى الجامعه ويحلل السجاير فى نهار رمضان ويستهزا بالحجاب ويحلل الزنا والفجور يحرم الفضيله ويحلل الرذيله والفساد ده افترى على ربنا بالكذب وحلل وحرم على مزاجه وتجرا على الفتوى ده يا اخواتى الكذب على الله وربنا اتوعد للى بيكذبوا عليه فقال عز وجل .. ولا تقولوا لما تصف ألسنتكم الكذب هذا حلال وهذا حرام لتفتروا على الله الكذب إن الذين يفترون على الله الكذب لا يفلحون متاع قليل ولهم عذاب أليم وقال تعالى .. إن الذين يفترون على الله الكذب لا يفلحون متاع قليل ولهم عذاب أليم، قل إن الذين يفترون على الله الكذب لا يفلحون متاع في الدنيا ثم إلينا مرجعهم ثم نذيقهم العذاب الشديد بما كانوا يكفرون وقال تعالى ... ويوم القيامة ترى الذين كذبوا على الله وجوههم مسودة أليس في جهنم مثوى للمتكبرين وقال تعالى .. انما يفتري الكذب الذين لا يؤمنون بآيات الله وأولئك هم الكاذبون يبقى الكذب على الله انك تحلل اللى حرمه ربنا وتحرم اللى حلله ربنا وده ابشع صوره من صور الكذب ثانى نوع من الكذب .. وهو الكذب على رسول الله يعنى فى كتتير من الناس تنسب اقوال للنبى صلى الله عليه وسلم والنبى مقلهاش تنشر الاحاديث الضعيفه الموضوعه الكاذبه وينسبها للنبى والنبى صلى الله عليه وسلم حذر من كده فقال صلى الله عليه وسلم ... قال رسول الله صلى الله عليه وسلم من كذب علي متعمدا فليتبوأ مقعده من النار رواه البخارى ومسلم وده الكذب على رسول الله ثالث نوع من انواع الكذب وهو الكذب على الناس تكذب على اللى حواليك وتقول كلام غير مطابق للواقع دى يا اخواتى انواع الكذب وفى حاجه مهمه جداا جدا كلنا واقعين فيها ومش واخدين لبالنا منها اللى هى يا جماعه الكذب لاضحاك الناس او بمعنى اوضح النكت النكت يا اخواتى حرام ايه ده يا اخت انتى انتى بتقولى ايه ؟؟؟ الضحك حرام ؟؟ حتى الضحك هتحرموه ؟؟؟ انتوا بتحللوا وتحرموا على مزاجكوا ولا ايه ؟؟؟ النكت يا اخواتى حرام وده مش كلامى انا ده كلام النبى صلى الله عليه وسلم طيب فين الدليل ؟؟؟ الدليل من حديث النبى صلى الله عليه وسلم حدثنا محمد بن بشار حدثنا يحيى بن سعيد حدثنا بهز بن حكيم حدثني أبي عن جدي قال سمعت النبي صلى الله عليه وسلم يقول ويل للذي يحدث بالحديث ليضحك به القوم فيكذب ويل له ويل له قال وفي الباب عن أبي هريرة قال هذا حديث حسن والحديث أخرجه أحمد , وأبو داود , والنسائي , والحاكم والدارمي ده كلام النبى يا جماعه ممكن حد يقول طيب النبى مقلش كلمه نكت فى الحديث ؟؟ هقولك تعالى نشرح الفاظ الحديث النبى بيقول .. هلاك عظيم للشخص اللى يتكلم ويقول كلام كذب علشان يضحك بيه الناس الويل ليه الويل ليه النبى كرر كلمه ويل ثلاث مرات فى الحديث وده ان دل فانه يدل على شده الهلاك للشخص اللى يقول كلام كذب علشان يضحك بيه الناس والنكت ايه يا جماعه غير كلام كذب فى كذب ؟؟ واحد يجيب نكت لاصحابه علشان يضحكهم يقول مره واحد صعيدى عمل كذا وكذا وحصله كذا وكذا والكلام ده اصلا كذب تاليف فى تاليف وكلام محصلش بس فلان بيقوله علشان يضحك اصحابه ويستهزا بالرجل الصعيدى ويسخر منه وننسب لاهل الصعيد الغباء والحماقه ونقلل من قدرهم وننتقصهم ويبقى اغتاب اهل الصعيد كلهم مش هو ده اللى فى النكت ؟؟ يعنى كلام كذب فى كذب بالاضافه الى السخريه والاستهزاء بالناس وخلاص شوفتوا يا جماعه ازاى النكت حرام ؟؟ فالشخص اللى يالف كلام او يقول نكت او يحكى قصص بالكذب علشان يضحك بيها الناس فهو كده عاص لله ولرسوله وكذاب وكمان يا اخواتى فى حاجه اسمها كذبه ابريل ينتشر فى شهر ابريل كذبه الناس تنشرها ده حرام بردوا سئل شيخ الاسلام ابن تيمية رحمه الله عمن يتحدث بين الناس بكلام وحكايات مفتعلة كلها كذب هل يجوز ذلك فأجاب أماالمتحدث بأحاديث مفتعلة ليضحك الناس أو لغرض آخر فإنه عاص لله ورسوله يبقى حرام النكت دى يا اخواتى والنبى اتوعد للشخص اللى بيقول كلام كذب علشان يضحك بيه الناس فقال ويل للذي يحدث بالحديث ليضحك به القوم فيكذب ويل له ويل له ايه ده يعنى خلاص مش هنضحك تانى ؟؟؟ ده حتى النبى صلى الله عليه وسلم كان يمزح ويبتسم هقولك اه النبى كان بيمزح بس بالحق اسمع حديث النبى صلى الله عليه وسلم عن سعيد المقبري عن أبي هريرة قال قالوا يا رسول الله إنك تداعبنا قال إني لا أقول إلا حقا رواه الترمذي والإمام أحمد فكان النبى يمزح ولا يقول الا حقا يعنى كان يبتسم ويمزح لمواقف حقيقيه واقعه لمواقف صادقه تضحك مش نكت وكلام كذب فانت مفيش مانع انك تضحك مع اصحابك وتمزح معاهم بس بصدق عادى لو ذكرت موقف حقيقى حصل يضحك او قصه حقيقيه حصلت تضحك عادى لو ذكرتها لاصحابك بغرض الضحك انت تعرف لو سيبت النكت دى والكلام الكذب اللى كنت بتقوله لاصحابك علشان تضحكهم هيكون ليك مكافاه كبيره جدا ومضمونه ؟ تعرف ايه هى المكافاه دى ؟؟؟ المكافاه بيت فى وسط الجنه واللى ضامن ليك البيت ده النبى صلى الله عليه وسلم والدليل على الكلام ده قول النبى صلى الله عليه وسلم .. أنازعيم ببيت في ربض الجنة لمن ترك المراء وإن كان محقا، وببيت في وسط الجنةلمن ترك الكذب وإن كان مازحاً، وببيت في أعلى الجنة لمن حسَّن خُلُقَه رواه أبو داود النبى بيقول انا ضامن وكفيل ببيت فى اطراف الجنه للى هيترك الجدال حتى لو كان محق وببيت فى وسط الجنه للى هيترك الكذب فى المزح وبيت فى اعلى الجنه للشخص اللى هيحسن خلقه ايه رئيكم يا جماعه ؟؟؟؟؟ ده النبى بنفسه اللى ضامنلك البيت يبقى كلنا من اللحظه دى نبطل النكت تعالوا يا اخواتى نشوف الحالات اللى بيجوز فيها الكذب فى ثلاث حالات مرخص فيها الكذب ينفع نكذب ونقول غير الحقيقه وربنا مش هيعاقبنا على الكذب ده بل ربنا هيعطينا ثواب واجر عليه اول حاله تجوز فيها الكذب .. فى الصلح بين المتخاصمين يعنى مثلا لو لاقيت اتنين من اصحابك متخاصمين وانت حاولت انك تصلح بينهم فمفيش مانع انك تروح لصاحبك الاول وتقوله ده فلان بيحبك ودايما بيتكلم عليك بالخير ويصفك بالصفات الجميله وتروح لصاحبك التانى وتقوله نفس الكلام لغايه ما يتصالحوا ويرجعوا زى الاول مع بعض ويرجع الحب والموده بينهم دى اول حاله من الحالات اللى بيجوز فيها الكذب ثانى حاله الكذب على الاعداء فلو واحد مسلم وقع فى ايدين العدو وطلبوا منه معلومات عن بلده فالواجب على المسلم انه ميقولش معلومات بلده لا هو يعطيهم معلومات كاذبه علشان ميضرش بلاده الحاله الثالثه الكذب فى الحياه الزوجيه يعنى مثلا واحد متزوج بواحده شكلها مش جميل او فيها صفه او خلق مش كويس فمينفعش يقولها انتى ذميمه انتى قبيحه انا لا ارغب فيكى انا مش بحبك انا مش طايق اقعد معاكى لا يا جماعه مينفعش الكلام ده لان ده مش من اداب الاسلام فعلى الزوج انه يرضى زوجته ويطيب خاطرها ويصفها بالجمال ويبينلها انه سعيد بيها حتى لو كان كله ده بالكذب وكذلك الزوجه تعمل كده مع زوجها وتقوله الكلام ده حتى لو كان بالكذب علشان البيت ميخربش والاطفال ميتشردوش وتستمر الحياه بدون مشاكل وتستقر الاسره وده يا جماعه ميعتبرش كذب وصاحبه ربنا مش هيعاقبه عليه لالا ده ربنا هيعطيه اجر وثواب ممكن حد يقولى يا اختى انتى جبتى الكلام ده منين ؟؟؟؟ فين الدليل على كلامك ؟؟؟ اصلوا انتى بتقولى كلام خطير واحنا عاوزين الدليل منك ده انتى من شويه لسه قايله لينا ان الكذب حرام وحرام اللى يحلل ويحرم على مزاجه يا ويله ايه بقى الكلام دة ؟؟؟؟؟؟ وفين الدليل ؟؟؟؟؟؟ الدليل يا جماعه على الحالات اللى بيجوز فيها الكذب من كلام النبى صلى الله عليه وسلم روى البخاري ومسلم عن أم كلثوم بنت عقبة بن أبي معيط قالت: سمعت رسول الله صلى الله عليه وسلم يقول: ليس الكذاب الذي يصلح بين الناس فينمي خيرا أو يقول خيرا. وفي رواية: ولم أسمعه يرخص في شيء مما يقول الناس إلا في ثلاث: تعني الحرب، والإصلاح بين الناس، وحديث الرجل امرأته، وحديث المرأة زوجها حديث اخر .. عن اسماء بنت يزيد رضى الله عنها وارضاها انها قالت قال رسول الله صلى الله عليه وسلم لا يحل الكذب الا فى ثلاث يحدث الرجل امراته ليرضيها .. والكذب فى الحرب .. والكذب ليصلح بين الناس والحديث صححه الألباني في صحيح الترمذي . بعد ما خلصنا كلامنا عن الكذب فى سؤال هنا مهم جدا عاوزه اوجه لكل مسلم ومسلمه انت بتكذب ؟؟؟ انت كذاب ؟؟ ولو كنت بتكذب احيانا بتحس ان ده هو الصح ؟؟؟ بتحس بايه وانت بتكذب ؟؟؟؟ احساسك ايه وشعورك ايه ؟؟؟؟؟ وانت بتكذب وبعد ما تكذب ؟؟ هل ضميرك بيبقى مستريح بعد ما كذبت .؟؟؟ انت بتكذب ليه ؟؟؟؟؟ ليه الكذب ؟؟؟؟؟؟ من اهم اسباب الهلكه والضياع والتدمير الكذب الكذاب يمحو الله البركه فى كل امر من امور حياته متكذبش متقولش مش قادر ابطل كذب لالالا انت تقدر متكذبش وتقول اصلوا انا عندى ظروف لا معندكش ظروف هتفضل لحد امتى تكذب ؟؟؟ هتفضل لحد امتى تلف وتدور ؟؟؟؟؟؟ والله هتتسأل عن كل لفظه يتلفظ بيها لسانك علشان وقعت فى مشكله او فى ورطه فعلشان تخرج منها تروح تكذب ؟؟؟ ولا بتكذب علشان تنول وجاهه وتعظيم من الناس ؟؟؟ وتبان حاجه كبيره ؟؟ ولا تكذب علشان ترضى الناس ؟؟ ولا بتكذب علشان تمشى حالك وتكسب ؟؟؟ ليه يا جماعه الكذب حضرتك تفتكر انك لما بتكذب على الناس يبقى انت كده نجيت ؟؟ وحققت اللى عاوزه ؟؟؟ لا والله انت ممكن تدارى كذبك على الخلق ولكن هتبقى مفضوح قدام الخالق ربنا عارف انك كذاب ومكتوب عنده من الكذابين وازاى تقدر تكذب على الناس وانت متيقن ان ربنا عالم انك كذاب فين الحياء من ربنا ؟؟؟ فين يا جماعه ؟؟؟ هو ربنا هين عليك للدرجه دى ؟؟ تكذب على الناس علشان خايف من حاجه معينه ومش خايف من ربنا ؟؟؟ اخى المسلم .. اختى المسلمه لا يكذب المرء إلاّ من مهانته أو مفعلة السوء أو من قلة الأدب تعالى اسمع ربنا قال ايه على الكذابين وبعدها هسيبلك القرار لاما تبطل الكذب وتكون صادق لاما ترضى بالعذاب وتبقى انت اللى جيبت العذاب لنفسك وظلمت نفسك قال تعالى .. ويل لكل أفاك أثيم والأفاك هو الكذاب في اقواله، والأثيم في افعاله. وقال سبحانه قتل الخراصون اي لعن وقبح الكذابون. في قلوبهم مرض فزادهم الله مرضاً ولهم عذاب أليم بما كانوا يكذبون إن الله لا يهدى من هو مسرف كذاب هـــــــا ؟؟؟؟؟ عاوز تنطبق عليك الايات دى ؟؟؟؟؟؟؟؟؟؟؟؟ اترك لك الخيار يا اخى والله محدش هينجيك فى الدنيا والاخره الا الصدق فالصدق نجاه ولو كان فيه الهلكه عود لسانك على الصدق وتب لله قبل فوات الاوان وسله ان يعفو عنك وان يرحمك ويقبل توبتك وابشر فان الله غفور رحيم يقبل توبه التائبين مهما كبر الذنب وعظم الجرم اخوتى اكتفى بهذا القدر وصلى اللهم على محمد وعلى اله وصحبه اجمعين والسلام عليكم ورحمه الله وبركاته
|
|
| أدوات الموضوع | |
|
|
